يا نسرين ... فيه فرق واجد بينّا الإثنين نبي انفهمك بالعق

القصيد بين الشاعر وبنت اسمها نسرين المهم الشاعر راجل ولد بادية والبنت عايشة في المدينة وهادا اللي صار بيناته

والصراحة ما نرف اسم الشاعر اللي قايلها




يا نسرين ... فيه فرق واجد بينّا الإثنين

نبّي نفهّمك بالعقل

أنــا عــيـــشـتي عَــــصْـــران ... والـفــرق واجــد ودلال الــــــوان

نــا حوشـنا مِـبني بلا عِمـدان ... وإنتِ حـوشكم تحت الوطـا دورين

نـا الكرهــبة داتســن بلا بيـبان ... وانـتم الكمــري زواقـها لونيــــن

وانــا معــاشـــي بـ15زمــان ... وانتــم بـفـيــزا كــرت صــرّافــيــن

وانـا لِـبِسْـتـي عـربي بلا كيطان ... وانتِ الوشاح تصـمـيم سورييـن

وأنا بوي وأمي يبصْمِن بَصْمان ... وإنتِ بوك وأمك الجامعة قاريين

خوتي قروا في الجامع القرآن ... وخوتك مازالوا يحضّروا في برلين

خوالي يربّـو في الإبـل والضان ... وانتِ خوالك يـتاجروا في الصيـن

وإنتِ على جاكسون أعلـنتي أحزان ... وأنا سـألـت عليه أصله مـنيـن

وإنتِ تُـرقصي على الأروج والكمان ... وأنا على الـزُكرة نزيد حنيـن

وانتِ تعــطّـري بعـطــور من لـوران ... وأنا بتــايــد نغـسله الجـبـيـن

وأنا سـهرتي في البَــرّ والقيــزان ... وانتِ التابعي في صوفيا لورين

وأرقى إيكالي مبكبكة وعصبان ... وانتِ البتــيزا والهمبورجا شكليـن

وأنا الشاهي وحـيلتي الـدّخان ... وانتِ عصيــرك راوخ وبيـبـسـيـيـن

وأنا الرفافــة سعــد وعمران ... وانتِ وهَنــادي وجـارتــك نِـــرمـيـن



يا نسرين ... فيه فرق واجد بينّا الإثنين

نبّي نفهّمك بالعقل


المهم ردت عليه نسريت وقالت :


قالتلــي عـــــــــــــادي ... أنــا مــن الحضَــر وأنــتَ أصــيل إبــْوَادي

صحيح نا نِـبّـي الجـو الهـادي ... وأنتم على بسيــط شيء مِـلّـتَـمين

وأنتم في كل منـاسبــة جِــرادي ... وتـقـمـعــزوا بالـيوم واليـومـيـن

وأنتـم تحبّـوا وكَـالكُــم سقّــادي ... تْـلاّقـوا عليها قـصعـة البــازيــن

وأنتم طبخكــم في القدر والبرادى ... ولا تعرفوا بَكْـرج ولا طــاجين

وتنْور خبزة فيه عشر فِرادى ... وتحْمـيس زميطة إتْـكـون عــوين

وديمــة الحطب وناركـم وقّـــادي ... وديمة بزمـايل رؤسكم لَـوّييْـن

وحتى عِرسكم رَابخ وحِسّه صَادي ... وغناكم عَلْم وكِشك مِجْرادين

والهَـدرْزة إرْكَـيّـب ومِنْـداريـن ... وتِجِـبْـدوا في تـاريـخ رَاح دِفـيـن

وإنتم عزايـزكم من أول بَادي ... على السِّـبِـر تِحلّـفْـك بِميـة إيميـن

وتصير مَشغْلة في هَداك قَطَع الوادي ... إتْجوْ بالمعيْط كلكم فازعين

وإنتم تحـدّروا للسوق بالمـيعـادي ... وأنـا للتَســوّق دايــرة روتيــن

وإنتوا إتْنضوا الفجر وين ينـادي ... وأنا الساعة إطناش هذا ويـن

الشغالة في الصبح تجيبلي فربّي ... وبريوش بالشكلاتة على لونين

وأنا صباح الخير هـاي لِدادي ... وإنتـوا عالنِشْدة تـاخدوا ساعتين

لا تعرفـوا سـاحـات لا نوادي ... ولا تـعـرفــوا صالـة ولا تـمـريــن

وأنا المُــزيّـن هـو حـدود مـرادي ... وإنتـوا على الكُحْـل مُصـرّيـن

وأنا نِـبّـيـه اللبـس ليّا مِـقـادي ... وإنتـوا العبايـة كـلكم رافـضــيـن

وإنتم خْــبــرَكم بالـوصَـا ومِـنادي ... وأنا بـلـبـيـانـا إنْـديـر رنـيــن

وتِـفنـيص ديمة واتييْـن قِصَادي ... كل شيء كلمة وقُـص جدّيـيْـن

وكانـك تِبـيها عاد حَـادي بَـادي ... تـأخر الخِـلْـفـه عـام ولاّ إتنـيـن

وتبقـــى العَــزارة إتْــجي وِدادي ... وزينـة الحياة بالمــال والبَنـيـن

وتدْويرالمَشاكل بين هادي وهادي ... وحتى المرض يا لَمس ولاّ عين

نَا عارفة عِشتوا حياة إنكادي ... وقاسيتـوا العـازه من الزمان سنين

المطلوب تنسلخـوا عن المبادي ... وتواكبــوا عصــر التطـور زيــن

المهم مانـبـيـش جــو رمادي ... نِـبّـيـك تُحضـــر كيفـهم الآخـــريــن

تغيْر اللهجة تقولي يا فــؤادي ... (وشِــجْ) ياروحى ونعــم (أُوكيــن)

ونعـيّـشك فـي عِزّ يا ودادي ... في قفــص ذهبي حياة عصفــوريــن


زاد الشاعر رد وقال

يا نسرين ... فيه فرق واجد بينّا الإثنين

نبّي نفهّمك بالعقل

يا غزيْلة إنتِ ويا أمّـورة ... أرجوك تسمعي نوضّـح معاك الصورة

موالك اللي في الـراس فيه خطوره ... عيدي النظر وفيه شوفي زين

إنتِ تعرفــي ناسي أصحاب مشوره ... أجواد ليبيا بالصيت معروفيــن

وإنتِ تعرفــي عــادتــنا المشهوره ... كسّــابة وسيـــع الــدّير ركّابـيـن

وإنتِ تعرفي عيّلنا إيجيب الدورة ... كيف في المدارس كيف حفظ الدين

وإنتِ تعــرفي تاريخنــا بسطــوره ... وأبطــال في التاريـخ مـذكوريــن

وإنتِ تعـرفي شـامخ نخـل بثموره ... وإنتِ تعـرفي بالعِـلم مشهـوريـن

وإنتِ تعـرفي التراث كـل عـصـوره ... مـازال نِـحْـيـيـوا فـيه مُلتـزمين

أنا عارفك عِـشـتـي حيـاة مَـغْـمـوره ... مـا تعـرفي اليـسار من اليميـن

سَحْـنـونة ودلوعة وربــة بـورة ... كـل شـي واتــي إيجـيك حتى دَيْـن

بـوك دلّـلـك ماهـوش عـارف دوره ... وأمك بسُـلـطـتها على المسكيـن

الحيـاة بالتجارب والأيام غَـروره ... والخاتـمـة بالـخيـر قـولي آميـــن

وبــــالله يانسرين فُــضّـي السـيـرة ... على قـولـهم نـا وانــتــي ويــن


يا نسرين ... فيه فرق واجد بينّا الإثنين
0